محمد ماكري

واحد السلام عليكم من جديد عدنا و العود أحمد, هد ليام داير هضرة على شي زيادة جاية في البوطا و السكر من هنا لأخر السنة , شخصيا مليت هد الفيلم ديال الفايسبوك و ميسيو بينكي . الفايسبوك بطلق القنبول و بينكي ينفي.

 

ولكن ملي الأمر تعلق بالبوطا و السكر درت واحد الوقفة تأملية مع ذاتي , وكيفاش تلقيت الخبر أنا شخصيا, الخبر الصاعقة وصلني من خلال واحد الصديق بالطريقة التالية "واش فراسك في راس لعام الجاي لبوطة غادي توصل 140 درهم, و السكر "القالب" غادي يوصل 25 درهم ,حتا لهنا ظننت الأمر مجرد مزحة باسلة من صديق حامض , و جاوبتو كالأتي "ساهلة حلوة راس العام نطيبوها على العواد في بلاصة السكر نجيبو قصيبات من الشمندر و ندردروهم فوق لعجينة , و غادي تكون حلوة صحية و بنينة" .

ولكن السيد حلف ليا أنو قرا و عطاني السيت دخلت و قريت تا أنا ديك الفضيحة أواه هدشي بصح , و 'بصح' كنقولها واخا سي بنكيران نفى الخبــر ولكن ماشي النفي القــاطع ,قال بما معناه راني غير ماصبت ليكم جهد أما والله حتا نزيدها و راني كنخمم أنا و لباجديا صحابي – وهنا باجديا ماشي جمع بوجادي ولكن جاية من حزب لبيجيدي- . رجوعا للسكر و لڭاز, ولفنا من هد الحكومة تلعب معنا, تـلوح لينا شي خبيرة زعما حڭا راها تسريب من مصدر حكومي, أصلا هـد المصدر لي ديما كايسرب ديرو ليه ليكوش و هنونا, التسريب كيكون ديما جس نبض للشارع إلا سكت صافي غادي دوز الدكاكة على عباد الله بحال ديما , وإلا ناض الصداع يبدلو لومبالاج للقرار و يعاودو يسربوه كجس نبض من جديد , الخلاصة أنو من دابا شريو السكر و خبوه الدقة جاية جاية.

ولكن الا فكرنا مزيان الحكومة و الله حتى ذكية , دابا كيصبقـو لينا لخبار باش المواطن المغربي يكعا و يتفقـص و يمرض في عظامو ومن تما يطلع ليه السكر- الله ينجينا و ينجيكم-, إذن غادي يبعد من السكر واخا لقالب يدير 50 درهم هو ماشي سوقو قالبها غا مسوس و ريجم, والله حتا هد بينكي إلا عبقري انشطاين مايوصل لحكومتنا تا بي شبر.

أما لڭــاز تاهو فكرو فيه راه دايرين دعم مالي في الجامعات للبحث العلمي شكون يجيب شي اختراع يفيد المواطنين , و البحث خاصو يكون على آلة أو طريقة لسحب الــڭـاز من رأس المغربي و إعادة تدويره و من تم ملأ قنينات البوطا الڭاز به. بلغة أبسط يجي بينكي و رباعتو يهــيطرونا علينا في البرلمان و يزيدونا في المواد الأساسية و يقلصو مناصب الشغل و في الأخير عفا الله عما سلف .أكيد غادي يطلع ليكم الڭـــاز لراس من هد لفعايل. اوا لي طلع ليه الـڭـاز يعمر بيه أتاي و يبرد على قلبو .
و كمساعدة مني في المشروع الحكومي الواعد و الذي يثمل في إعلال 20 مليون مواطن مغربي بمرض السكر المزمن أدعوكم لقراءة قانون تعويضات الباشا و العامل و هلم جرة و لضمان نتيجة أسرع قراو المبالغ مرة و جوج و ثلاتة و قارنوها مع صالير ديالكم هدشي أصلا الا عندكم شي صالير

السلام عليكم تهلاو

محمد ماڭري
للتواصل على صفحة الفايسبوك

http://www.facebook.com/pages/Magri-Mohammed/199107393470740